ശമ്പളം

രണ്ടാമത്തെ ശമ്പളം കിട്ടി. ഓഫീസില്‍ നിന്നും ഞാനും എന്‍റെ കൂടെ വര്‍ക്ക്‌ ചെയ്യുന്ന ശ്രുതിയും ഇറങ്ങി ഷോപ്പിങ്ങിനു. ആദ്യം കിട്ടിയ ശമ്പളം നേരെ  അമ്മടെ  കയ്യില്‍ കൊടുത്തിരുന്നു . രണ്ടാമത്തെ  ശമ്പളം  അച്ഛന്‍റെ കയ്യില്‍ കൊടുക്കണം എന്നായിരുന്നു ആഗ്രഹം. എങ്കിലും ചേച്ചിക്കും കിച്ചുനും ഡ്രസ്സ്‌ വാങ്ങി കൊടുക്കാന്‍ ആദ്യമേ  തീരുമാനിച്ചതാണ്. അത് കൊണ്ടു തന്നെ ഞങ്ങള്‍ ഡ്യൂട്ടി കഴിഞ്ഞു ഇറങ്ങി നടന്നു. ആദ്യം ചെരുപ്പ് കടയില്‍ കയറി രണ്ടു പേരും ചെരുപ്പ് വാങ്ങി. അത് കഴിഞ്ഞു ഓട്ടോ പിടിച്ചു നേരെ വിട്ടു 'പുളിമൂട്ടില്‍ സില്‍ക്സിലെക്ക്‌. ......'.

ഡ്രസ്സ്‌ വാങ്ങി കഴിഞ്ഞപ്പോളും ആശ്വാസം. ഒരുപാടൊന്നും കയ്യില്‍ന്നു പോയില്ല.. താമസിക്കുന്ന വീട്ടില്‍ എത്തി , നേരെ ഹൌസ് ഓണേര്‍ക്ക് വാടക കൊടുത്തു. മൂവായിരത്തി മുന്നൂറു രൂപയാണ് ഭക്ഷണവും താമസവും വാടക ആദ്യം പറഞ്ഞിരുന്നത്.ഇപ്പൊ വാടക കൊടുത്തപ്പോ അവര്‍ പറഞ്ഞു മൂവായിരത്തി അഞ്ഞൂറ് വേണം എന്ന്. ഞാന്‍ അന്തം വിട്ടു നിന്ന് പോയി. ''അതെങ്ങനെ ശരിയാകും?" ഞാന്‍ ചോദിച്ചു . മുന്‍കൂട്ടി പറഞ്ഞിട്ടില്ല. അത് പോരഞ്ഞു അവര്‍ക്ക് കരണ്ട് ബില്‍ വേറെ കൊടുക്കണംത്രേ.. ഈ വ്യവസ്തയൊന്നും ഞാന്‍ താമസിക്കാന്‍ വന്നപ്പോള്‍ പറഞ്ഞു കേട്ടില്ല..എന്‍റെ ഭാഗം വ്യക്തമാക്കി  എങ്കിലും ഞാന്‍ അധികം തര്‍ക്കിക്കാന്‍ നിന്നില്ല. അവര്‍ പറഞ്ഞ വാടക കൊടുത്തു തല്ക്കാലം. 

റൂമില്‍ കയറി വാതില്‍ അടച്ചു മുന്നിലിരുന്ന പേഴ്സ് തുറന്നു നോക്കി. 500 രൂപ ബാക്കി.സാലറി കിട്ടിയാല്‍ കുറച്ചു കാര്യങ്ങള്‍ പ്ലാന്‍ ചെയ്തതായിരുന്നു. ഇനിയൊന്നും നടക്കില്ല.  കണ്ണില്‍ വെള്ളം നിറഞ്ഞു. 

ഇതാണ് മോളെ ജീവിതം എന്ന് സ്വയം ആശ്വസിപ്പിച്ചു. അല്ലാതെന്തു ചെയ്യാന്‍ ????......